Mosteiro bieito construído no século X e situado na ribeira do río Deza. Obra arquitectónica do románico de transición a un gótico tardío, constitúe un dos monumentos máis característicos da arte medieval galega, influenciado polas manifestacións artísticas compostelás; en concreto, polo estilo que o Mestre Mateo desenvolveu na catedral de Santiago de Compostela.

O Sendeiro do Deza pasa polo mosteiro de Carboeiro e a fervenza, en caída libre, máis grande de Galicia, con 30 m de altura. A auga que cae é do río Toxa, afluente do Deza que lle dá nome á fervenza. O camiño faise atravesando unha mesta fraga de carballos, castiñeiros, bidueiros e outras especies autóctonas que forman unha paisaxe única que engaiola o visitante.

Pazo do século XVII que acolle o Centro de Xestión do Coñecemento Arqueolóxico (Deputación de Pontevedra), o Museo Galego da Marioneta e do Xoguete (Imaxina, Concello de Lalín) e a Sala Loriga, referente da aviación española.

No castro realizáronse varias intervencións arqueolóxicas promovidas pola Casa do Patrón, museo etnográfico onde se poden ver os materiais recuperados no castro. Nas escavacións localizáronse varias estruturas habitacionais, a muralla e un dobre foso escavado na rocha.

Situado na planta baixa do Concello de Lalín, é un espazo de dinamización turístico-cultural. Está concibido como un museo virtual da cultura castrexa onde se dan cita lendas, castros e gastronomía.